Pagdala kang Ecleo sa Sugbo gipangandaman

CEBU, Philippines — Gipangandaman sa Police Regional Office (PRO7) ang posible nga pagdala dinhi sa kombiktado sa pagpatay sa iyang asawa nga si Supreme Master sa Philippine Benevolent Missionaries Association (PBMA) Ruben Ecleo Jr.

Matud ni PRO7 Director Brigadier General Albert Ferro nga kung dalhon sa Central Visayas si Ecleo kinahanglang pahugtan ang seguridad niini tungod kay kini usa ka high profile criminal sa nasud.

Wala pay abiso ang kadagkoan sa kapolisan sa kaulohan kun dad-on  kini sa Central Visayas.

Adunay warrant of arrest sa kasong parricide nga giluwatan ni judge Soliver Peras sa Regional Trial Court (RTC) Branch 10 sa Dakbayan sa Sugbo si Ecleo tungod human kini ni- jump bail human nakapiyansa apan wala na mopakita hangtud nga gibasahan kini sa hukom.

Sa wala pa siya nakombikto sa maong kaso, una na siyang gisentensiyahan sa Sandiganbayan niadtong Oktobre 2006 pagkapriso og 31 ug tunga sa tuig tungod sa anomalosong construction deals sa dihang siya pay mayor sa San Jose sa Surigao del Norte gikan tuig 1991-94.

“That will be another issue that will be our preparation our security preparation because he is a high profile. I think number 1 national most wanted person (si Ecleo) so we need to secure him na di makatakas because that guy is very influential person,” matud pa ni Ferro.

Nasikop si Ecleo sa usa ka subdivision sa San Fernando, Pampanga sa hiniusang pwersa sa National Capital Region Police Office (NCRPO) ubos sa liderato ni NCRPO Chief Police Major General Debold Sinas.

Matud ni Sinas kinsa nakahinabi sa PNP Defense Press Corp sa Sugbo  nga niadto pang Enero gisugdan ang pag-surveillance kang Ecleo human nga nakadawat sila og impormasyon nga wala na kini didto sa Dinagat island sa Surigao del Norte.

Hangtud nga adunay nakahatag kanila og impormasyon naa sa Pampanga nagtago ang supremo sa PBMA. Matud pa giatangan nila kini nga mogawas tungod kay padung kini moduwa og golf.

Si Ecleo nigamit og alyas nga Manuel Liberal ug giingong nitago sab kini sa Angeles City, silingang siyudad sa San Fernando sa maong probinsya.

Ang pagkasikop kaniya may kalambigitan sa warrant of arrest nga giisyu sa Sandiganbayan First Division sa kasong graft. Apil sa gidakop ang iyang drayber nga si Benjie Fernan Relacion.

Si Ecleo, 60, maoy prime suspect sa pagpatay sa iyang asawa nga si Alona Bacolod-Ecleo niadtong Enero 5, 2002 diha sa ilang balay sa Forest Hills, Banawa, Cebu City.

Napalgan ang nadugtang lawas ni Alona sa hilit nga dapit sa Dalaguete pipila ka adlaw human kini na-missing. Apan si Ecleo kusganong mihimakak sa mga pasangil batok kaniya.

Ang gituohang bugtong nakasaksi sa maong krimen mao ang igsuon ni Alona nga si Ben Bacolod, apan gimasaker kini kauban ang ilang amahan nga si Elpidio ug Rosalia ug ilang igsuong si Evelyn niadtong Hunyo 2002.Ang nag-inusarang gunman napatay sa mga miresponding polis.

Si Ecleo nitahan sa kapolisan niadtong Hunyo 19, 2002 human sa duguong engkwentro sa kapolisan ug sa mga armado niining sakop sa PBMA sa San Jose , Dinagat Island. Atol sa maong operasyon 23 ka tawo ang nakalas.

Marso 1, 2004 nibutang og piyansa nga P1 milyon si Ecleo diha sa RTC Branch 23 presiding judge Generosa Labra human ang iyang abogado nakapakita og medical certificate nga duna kini sakit sa kasing-kasing.

Tuig 2012, nahukman si Ecleo nga mabilanggo sa tibuok niyang kinabuhi ug gimandoan pagbayad og P25 milyones nga danyos sa banay’ng Bacolod. Apan wala na kini mopakita pa. /IBM (BANATNEWS)