Death penalty gihangop sa kapolisan
CEBU, Philippines — Uyon ang Police Regional Office 7 nga tinguha ni Presidente Rodrigo Duterte nga ibalik ang death penalty sa nalambigit sa ilegal nga drugas.
Kini sumala pa ni PRO-7 Director Albert Ferro subay sa pamahayang ni Duterte atol sa iyang ikalimang State of the Nation Address niadtong Lunes.
Nagtuo si Ferro nga moubos ang ilegal nga drugas sa nasud kung hukman nga patyon ang mga nagpadagan niini.
Iyang gipasabot nga kasagaran sa mga nangadakpan nga namaligya og ilegal nga drugas nga naa sa mga bilanggoan nagpadayon sa ilang ilegal nga kalihukan pinaagi sa ilang mga kontak sa gawas. Gihimakak niya ang kahadlok nga ang mga kabus lang ang maapektohan sa death penalty.
Gipasabot sab ni Ferro nga ang maong balaud mogukod niadtong mga opisyal sa gobiyerno lakip sa kapolisan nga mamatud-an nga protektor ug nalambigit mismo sa ilegal nga drugas.
Gipahibawo niya nga sa panahon nga naa pa siya sa Drug Enforcement Unit sa PNP daghang tag-as nga opisyal sa gobiyerno lakip na sa mga polis ang nadakpan ug naa pa sa sulod sa bilanggoan.
Gidayeg
Samtang gidayeg ni Talisay City Mayor Gerald Anthony “Samsam” Gullas Jr. ang SONA ni Duterte.
Usa sa iyang nauyonan ang baruganan sa presidente nga dili una itugot ang face-to-face classes hangtud nga wala pa ang vaccine sa COVID-19.
Uyon sab si Gullas nga pakusgan ang internet connections ilabi na karong panahon sa new normal aron kalikayan ang virus.
“The president has made a clear message that he is with us in our call for our the right services when it comes to internet and mobile connectivity,” dugang pa sa mayor. Gabriel C. Bonjoc/GMR (BANATNEWS)
- Latest
