Alo: Dili magpataka og palit og karne

CEBU, Philippines — Ang pangulo sa City Veterinarian Office sa Siyudad sa Talisay niawhag sa mamalitay og karne nga pillion sa pagpalit kadtong dili peligro sa panglawas.

Si Dr. Thessa Lorraine Alo, pangulo sa CVO nipadayag sa maong awhag tungod kay daghan karon ang namaligya gumikan sa sitwasyon karon sa pandemya.

Si Alo nagkanayon nga kinahanglang magmatngon ug dili irisgo ang panglawas ug dili mopalit og karne nga wala mapaubos sa inspeksyon sa ilang buhatan.

Si Alo niawhag nga adto lang mopalit sa registered meat vendors ug labing maayo nga susihon ang karne kon aduna ba kini marka nga meat inspection certificate pagmatuod nga gikan sa ihawan giihaw ang hayopan.

Ug kong gipalit pinaagi sa online ang karne kinahanglan nga pangitaan usab ang namamligya kong napaubos ba ang karne sa inspeksyon o mangayo og hulagway nga adunay  marka nga MIC. Matud ni Alo nga labing maayo nga habwaon dayon ang karne gikan sa sudlanan aron dili mabuot tungod  kay dali kini nga mabaho.

Nipasidaan si Alo nga dili dayon madani sa karne nga ibaligya og barato tungod kay  posible nga aduna kini deperensiya diin ang hayop patay na kini sa wala pa ihawa o masakiton kini. Ang mga mamalitay kinahanglang magmatngon kini sa pagpamalit og karne ilabi na diha sa online.

Dugang ni Alo nga kadtong mga mamaligya og karne kinahanglang mosubay kini sa proseso aron dili kini maproblema sa ilang gibaligya. —/BDB (BANATNEWS)