Mga bombero, polis nidonar og plasma

CEBU, Philippines — Dili lang pagluwas og kinabuhi atol sa sunog ang tahas sa kabomberohan sa Dakbayan sa Sugbo apan lakip na niadtong natakbuyan og coronavirus disease karong panahona.

Matud ni Senior Fire Officer 2 Wendel Villanueva, tigpamaba sa Cebu City Fire Station, nga daghan sa ilang kaubanan ang natakbuyan og COVID-19 apan nangayo na.

Kini ang hinungdan nga nahuna-hunaan sa ilang hepe nga si Fire Chief Inspector Josephus Alburo ang pagkumbensir sa mga sakop nga nangaayo na sa pagdonar sa plasma sa ilang dugo.

“Sa walay pag duha-duha nisanong ang mga personnel unya niadto mi deretso sa Vicente Sotto Memorial Medical Center alang sa pag-donate sa maong mga plasma sa mga nangaayo,” sigun ni Villanueva.

Moabot sa walo ka personnel sa CCFS ang ni-donate ug sigun ni Villanueva nga duna pay umaabot nga laing mga personnel nga mo-donate sab sa ilang plasma kun mahatagan na og clearance sa Cebu City Health Department.

Tinguha gyud sa CCFS nga makatabang sa nagkinahanglan ug giawhag nila ang publiko nga mobuhat sab sa ingon dungan sa pagbutyag nga libre ang ilang plasma donation.

Gipahibawo sab ni Villanueva nga kadtong mga fire sub-stations nila nga gi-lockdown sama sa Mabolo, Pahina ug Parian ang gibuksan na human ang mga personnel niini nga naigo sa COVID-19 ang naayo na.

Nasuta sab nga dunay gihimong mga lakang ang CCFS aron maproteksiyunan ang ilang mga tawo batok sa COVID-19.

“Atong gi-emphasize gyud nato ang health protocol actually in the next few days naa tay madawat usa sa mga institutions NGO 500 kuno na nga N95 mask for the personnel of Cebu City Fire Station and then ato gyud ng gibalik-balik ang kaning washing of hands ug ang scheduling pud of duty kung mahimo kanang mura naka-quarantine lang ka ba especially sa amoang operations nga kami nga naa sa opisina we work Monday to Friday,” dugang ni Villanueva.

Asoy ni Villanueva nga duna silay instruction gikan sa ilang national headquarters nga silang tanan mopaubos og mass swab testing, may sintomas man o wala.

Ang CCFS nakig-alayon na sa CCHD alang sa maong katuyuan aron gyud maseguro nga silang mga bombero dili carrier sa virus ug kun dunay magpositibo mailhan nila.

Samtang ang Police Regional Office 7 ug Regional Health Service 7 nagpahigayon na sa ikaduhang hugna sa ilang Makatao Malasakit Blood Plasma Donor Program niadtong Biyernes.

Nasayran nga 85 ka personnel nga nangaayo na sa COVID-19 ang nidonar sa ilang plasma sa dugo.

“Your gesture of donating blood is a selfless act in saving other people’s lives. The feat in overcoming COVID-19 will help save those who are badly hit by the deadly disease,” matud ni PRO-7 Director Albert Ignatius Ferro.

Ang unang hugna gipahigayon niadtong Hulyo 17 diin 40 ka polis nga naayo na sa COVID-19 ang nidonar sa ilang plasma aron pagsalbar niadtong grabe ang kahimtang tungod sa virus.

Ang PRO-7 nanghinaut nga mas daghan pang donor sa plasma aron daghan sab ang maluwas sa maong sakit sa Central Visayas. Jessa Mae H. Miranda/GMR (BANATNEWS)