‘Colonel’ nadakpan sa buybust
CEBU, Philippines — Usa ka ‘Colonel’ ang gidakop sa Toledo Police Station atol sa buybust operation niadtong Biyernes sa gabii sa Barangay Calongcalong Dakbayan Toledo.
Ang gidakop mao si 1Colonel De Dios, 36, nagpuyo sa maong lugar ug giila nga High Value Individual sa dakbayan.
Matud ni Police Lieutenant Colonel Janet Raffter tulo ka semana nilang gipanid-an si De Dios human nga nakadawat sila og impormasyon sa kalambigitan niini sa ilegal nga drugas.
Apan tungod sa pagpaubos ngadto sa Modified Enhanced Community Quarantine (MECQ) sa Dakbayan sa Sugbo nagnihit og kuhaanan si De Dios hinungdan nga ang mga karaang stocks sa shabu maoy gipamaligya niini.
Dili lang sa ilang barangay namaligya og drugas si De Dios kondili hasta sab sa mga silingang barangay.
Nakuha sa iyang posisyon mao ang mga pinutos nga gagmay nga pakete nga shabu nga mobalor ngadto sa P172 mil.
Kasong kalapasan sa Republic Act 9165 kun Comprehensive Dangerous Drugs Act of 2002 Section 5 ug 11 ang ipasaka batok kaniya. /IBM (BANATNEWS)
- Latest
