Pagtambong og misa sa National Shrine of St. Joseph gitugot na sa Mandaue

CEBU, Philippines — Hingpit na gyod nga gibuksan kagahapon ang pultahan  sa National Shrine of St. Joseph  sa Barangay Centro sa Dakbayan sa Mandaue alang sa pagsulod  sa mga relihiyosong katoliko alang sa pagtambong sa misa.

Subay niini hugot nga gipatuman sa simbahan ang mga health protocols aron paglikay sa pagkatap sa coronavirus disease. Kini naglakip sa pagdala og quarantine pass, pagsul-ob og face mask ingon man ang physical distancing sa pagpanglingkod sa mga manimbahay.

Dugang gipatuman sa pagsulod sa National Shrine of  Saint Joseph ang pagpaubos sa temperature check sa pagsulod sa simbahan ug ingon  man ang pagpang hunaw  kanunay og alcohol sa pagsulod sa pultahan.

Higpit usab nga gipatuman alang sa mga nanimba ang pagtunob sa  duha ka mga  tiil ngadto sa giandam nga tumbanan nga adunay sagol alcohol gikan sa pagsulod hangtud na sa ilang pagpangawas.

Samtang hugot nga gidid-an sa pagsulod ang mga nag-edad og 20 anyos paubos og 60 anyos pataas.

Laing gipahibalo  sa kaparian sa National  Shrine of Saint  Joseph nga dili lang sa adlaw nga Domingo ang misa  nga pagahimon kon dili apil na usab  ang adlaw nga Lunes hangtod na sa adlaw nga Biyernes. /MEL (BANATNEWS)