NAVFORCEN nipaubos sa lockdown

CEBU, Philippines — Gisuspenso una sa Naval Forces Central Command (NAVFORCEN) ang ilang operasyon sa pagpanghatud og hinabang ug mga medical equipment ngadto sa nagkalainlaing dapit gawas sa Central Visayas tungod kay nipaubos sila sa lockdown human ang 77 nila ka personnel nagpositibo sa covid-19.

Ang NAVFORCEN nahimutang kini diha sa Barangay Looc, Dakbayan sa Lapu-Lapu.

Ang NAVFORCEN nipatuman og lockdown human nasuta niadtong Huwebes nga nagpositibo sa covid-19 ang nahisgutan nilang mga personnel ug gipahiluna na kini sa ilang isolation center sulod sa ilang kampo.

Giingong ang 77 ka navy personnel paingon na kini na mo-recover gikan sa covid-19.

Si Lieutenant  Commander Neil Rafael Yvera, tigpamaba  sa NAFORFCEN nipadayag nga pulos nila mga frontliner ang nahisgutang mga personnel diin uban kanila nadestino kini  sa boarder control checkpoint  ug sa delivery sa essential nga panginahanglan sa katawhan.

Matud ni Yvera nga gikatakda ang ilang pagbalik sa operasyon sa Hulyo 18, 2020.

Ang mga personnel nga nataptan sa covid-19 padayon pa usab kining gi-isolate karon.

Nunot niini, Si Mayor Junard Ahong Chan ang nibisita sa NAVFORCEN niadtong Biyernes sa hapon aron usab sa paghatod sa mga folding bed, tulda ug reief good.

Si Chan nipadangat usab kini sa iyang pasalamat sa NAVFORCEN tungod sa gihimo niining sakripisyo ngadto sa mga Oponganon niining panahon sa pandemiya. /BDB (BANATNEWS)