Pulse oximeter ipanghatag sa Dakbayan sa Talisay

CEBU, Philippines — Ipanghatag sa Dakbayan sa Talisay ang kahimanan nga gitawag ug  “pulse oximeter” sa matag barangay sa maong syudad.

Suma pa ni Mayor Gerald Anthony “Samsam” Gullas Jr. nga ang oximeter maoy mosukod sa oxygen level sa matag indibidwal.

Nagkanayon si Mayor Gullas nga usa sa mga sintomas sa usa ka tawo nga positibo sa coronavirus disease  mao ang paglisod sa pagginhawa hinungdan nga nipalit ang syudad sa maong kahimanan.

Pinaagi sa paggamit sa pulse oximeter masuta ang kondisyon sa pagginhawa sa usaka tawo ug nga mahatagan gilayon kini ug dinaliang pagtagad.

Gidugang sa mayor nga karong panahona uso kayo ang ubo, sip-on ug hilanat busa angayan nga masusi dayon ang tinuod nga kahimtang sa panglawas sa matag indibidwal gumikan sa padayong hulga sa COVID-19.

Giklaro ni Mayor Gullas nga dili sakit ang paggamit sa oximeter tungod kay anha  ra man kini ibutang sa tudlo.

Samtang gihangyo sa mayor ang katawhan sa talisay sa pagkooperar sa tanang mga safety protocols nga gipatuman aron malikayan ang pagkatap sa COVID-19. /MEL (BANATNEWS)