Mga utlanan pahugtan balik

CEBU, Philippines — Tungod sa nagkadaghang kaso sa mga bag-ong kompirmadong natakboyan og novel coronavirus disease sa probinsya sa Sugbo ning nangaging mga adlaw, gimando ni Cebu Governor Gwendolyn Garcia nga pahugtan pagbalik ang mga utlanan niini sa Dakbayan sa Sugbo nga ubos pa karon sa enhanced community quarantine.

Si Garcia niluwat og Executive Order No. 17- H ug nalatid didto nga sugod karong Biyernes, Hunyo 26, 2020 ibalik pahugtan pagbalik ang border control.  Ang lalawigan anaa na sa general community quarantine, apan ning bag-o, nagkaanam og saka ang gidaghanon sa mga nataptan.

“Effective Friday (June 26, 2020) we will have to revert to strict border controls, wala na ko magpatawag sa meeting sa tanang mga Mayor it’s too big a task nga mag meeting na pud ta just to agree on this. I am deciding this now” pagpahibalo ni Garcia atol sa iyang virtual presser niadtong Hunyo 23, 2020.

Naghatag ang gobernador og 48-oras alang sa mga residente sa Probinsya sa Sugbo ug katong dili exempted sa border aron makadesisyon kun magpabilin sila sa dakbayan o mamauli sa ilang mga lungsod sa dili pa hugtan ang pagbantay sa mga utlanan.

Exemptions

Ubos sa iyang bag-ong EO, exempted sa restriction ang Gobernador, Bise Gobernador, board members, mga huwes sa Korte Suprema, Court of Appeals, Court of Tax Appeal, Sandiganbayan, regional, metropolitan city, ug municipal trial courts, Ombudsman, ug mga pangulo sa regional government agencies lakip na ilaang skeleton workforces.

Mga private ug government doctors, nurses ug ubang medical professionals, hospital workers, administrative staff. Skeletal workforce sa Philippine Red Cross, media personnel nga accredited sa Kapitolyo.

Mga sakop sa kapolisan, militar, coast guard ug ubang security personnel lakip na private security. Field personnel sa electricity, fuel ug petroleum related entites; VECO, MCWD, telecommunication companies. Empleyado sa mga banko, ug money transfer establishments, mga abogado, ug delivery personnel sa mga cargo nga maghatod sa goods kon diin dapat duha ra ang sakay apil driver.

Niangkon si Garcia nga sukad giluagan ang mga utlanan nidaghan ang kaso apan iyang gipasalig nga di hinoon kini kaayo makaalarma. Nabantayan sa gobernador nga ang mga lugar o syudad nga duol sa Cebu City maoy nanaghan ang kaso sama ta Talisay ug Minglanilla.

Traffic niluag

Tungod sa pagsuspenso sa tanang Quarantine Passes nga giisyu sa Cebu City ngadto sa publiko, nimenus sab ang gidaghanon sa mga sakyanan nga nagdagan sa kadalanan niini. Ang pagmenus sa mga sakyanan nabatyagan hangtud sa Dakbayan sa Talisay sugod sa miaging gabii.

Ang siyudad sa Talisay ubos sa GCQ apan padayon nga higpit nga pagpatuman sa safety protocols samtang gipahugtan sab ang pagbantay sa merkado sa Tabunok diin mangompra ang mga tawo apan gilimitahan ang makasulod aron di magdasok.