MCPO station 5 ‘lockdown’

CEBU , Philippines — Gibutangan og yellow line ang Police Station 5 sa Mandaue City Police Office sa Barangay Opao nga nagpasabot nga lockdown.

Kini tungod kay usa sa tulo nila ka dinakpan ang nagpositibo sa coronavirus disease 2019 sa swab test nga gipahigayon niadtong niaging adlaw.

Nunot sa maong lockdown ang mga polis nga duty nga naglakip na sa ilang hepe nga si Police Major Aldrin Villacampa ang dili una makagawas sa police station.

Ang mga polis sa maong police station nga off duty ug nakapauli na sa ilang panimalay ang lakip usab sa ipaubos sa COVID-19 test.

Sa kasamtangan ang mga alarma nga madawat sa police station maoy gitahasan sa pagtubag ang Police Station 1 sa Barangay Centro ug Police Station 3 sa Barangay Basak depende kung asa ang duol sa duha ka presinto sa tubagon nga alarma.

Sa nasayran nga ang kapolisan sa Presinto 5, tulo sa ilang dinakpan ang padulong na unta nga mogawas sa detention cell sa apan dihang gihimo ang swab test maoy nasuta nga positibo ang usa kanila hinungdan nga gimando sa City Health Department ang pag-lockdown niini. (BANAT NEWS)