Daghang lugar sa Talisay gibahaan

CEBU, Philippines — Daghang lugar sa Dakbayan sa Talisay ang gipangbaha human sa sunod-sunod nga adlaw nga walay puas ang uwan.

Si Mayor Gerald Anthony “Samsam” Gullas Jr. nagkanayon nga wala say puas ang mga tawag gikan sa nagkalain-laing barangay aron sila magpatabang sa ilang kahimtang.

Si Gullas nipadala sa Aksyon Agad Team aron maoy moasikaso sa suliran panahon niining ting-uwan.

Naobserbahan sa mayor nga ang pagkabara sa mga basura diha sa mga kanal maoy numero uno nga hinungdan kung nganong nitumaw ang pagsaka sa tubig.

Si Gary Togonon, pangulo sa AAT, nagkanayon nga gipangkulkog nila ang kanal sa South Road Properties (SRP) sa habig sa Barangay San Roque ingon man sa Barangay Linao nga mao sab ang dali dayon nga mosaka ang tubig sa karsada.

Siya nitataw nga daghang basura ang ilang nakuha nga maoy nakabara sa mga kanal.

Gawas pa niana, aduna sab silay mga sanga sa kahoy nga gipangputol nga peligro makaigo sa lumalabay ilabi na nga bati nga panahon ang nasinati. (BANAT NEWS)