Magsuon nanagat nalumos

CEBU, Philippines — Maguwang ang nalakip sa pagkamatay human tuyo nga niluwas sa iyang igsuon nga naanod sa sulog atol sa pagpanagat sa kadagatan sa Barangay Guiwanon, Lungsod sa Ginatilan niadtong Miyerkules sa gabii.

Ang nakalas naila nga si Hazel Kadusali, 28-anyos, ulitawo, ug igsuon niini nga si Lord Francis Sereño, 38-anyos, ulitawo, pulos taga Barangay Malatbo sa maong lungsod.

Matud ni Police Corporal Jayson Lobendina, desk officer sa Ginatilan Police Station nga nakadawat ang ilang buhatan og tawag may kalabutan sa giingong insidente sa pagkalumos hinungdan nga dali kini nga girespondehan.

Base sa inisyal nga imbestigasyon, nanagat si Kadusali uban sa mga kauban niining mananagat dihang nadala kini sa kusog nga sulog sa tubig.

Sumala pa ni Lobendina nga sa dihang nasayud ang maguwang sa gidangatan sa iyang manghud, suway usab kini nga nitabang sa pagpangita apan lakip kini nga nadala sa kusog nga sulog hinungdan nga nagtinabangay ang mga private ug local divers sa pagpangita sa managsuon pinaagi sa search and rescue operation apan wala kini igkita.

Gitug-an ni Lobendina nga kagahapon sa alas 7 pasado sa buntag unang nakit-an si Kadusali ug alas 8 pasado sa buntag sunod nga nakit-an si Sareño sa giladmon nga 85 ka tiil.

Dali pa untang gidala sa tambalanan ang managsuon apan gideklarar kini sa mga doctor nga patay na.

Ang managsuon naila gyud nga mamanaay ug managatay apan nadala lang gyud kini sila sa kusog nga sulog nga maoy ilang naingnan sa hinanali nga kamatayon human gituohang nalumos. /GMR (BANATNEWS)