Sunog sa Mandaue City Hall, usa angol

CEBU, Philippines — Tulo ka buhatan sa Mandaue City Hall ang nasunog kagahapon sa kaadlawon.

Ang nakaangkon og kadaut mao ang mga buhatan sa Sangguniang Panlungsod, Public Information Office ug laing sikbit pa nga buhatan.

Nadawat sa kabomberohan ang alarma sa sunog alas 2:49 sa kaadlawon ug hingpit nga na-fire out alas 3:58 sa kaadlawon. Wala hinooy natala nga nakalas sa maong sunog apan usa ka Winston Ouano ang nakaangkon og samad sa agtang.

Gibana-bana nga moabot ngadto sa P300 mil ka ang danyos sa maong sunog.

Ang ground commander sa maong sunog nga si Chief Inspector Bernard Batnag Jr. nihimo pa og imbestigasyon may kalabutan sa insidente aron masayran ang hinungdan niini.

Gihunong una ang pagdawat og transaksyon sa mga apektadong buhatan sa kagamhanan nga nahimutang sa Mandaue Presidencia.

Si Atty. Jamal Calipayan, nga maoy city administrator, niingon nga padayon gihapon hinuon nilang gipatambong sa ilang trabaho ang mga kawani ilabi na sa Department of General Services Office tungod kay mohimo man sila sa pagpanglimpyo sa ilang tagsa-tagsa ka buhatan.

Si Senior Fire Officer 1 Jade Roble sa Mandaue City Fire Department niingon nga unang nakatubag sa alarma sa sunog ang mga fire truck nga gidumala sa City Disaster Risk Reduction and Management Office hinungadan nga napugngan ang pagkatap sa kayo. Romeo T. Limpangog/GMR (BANATNEWS)