Mga pasahero nangatanggong

CEBU, Philippines — Wala masunod ang gisaad nga pagpadagan og 221 ka mga buses ini og pagpatuman na sa general community quarantine dinhi sa Cebu City sumala pa ni Atty. Rey Gealon, tigpamaba ni Cebu City Mayor Edgardo Labella. Sumala pang Gealon, dili pa tanang 221 ka mga buses nga maoy gipasalig sa Land Transportation Franchising and Regulatory Board (LTFRB) ang nakadagan niadtong Hunyo 1, 2020 nga maoy unang adlaw sa GCQ sa siyudad sa Sugbo.

Matud niya 35 percent lang ang deployment sa maong mga buses ang ilang nabantayan nga nagdagan hinungdan nga daghang mga pasahero ang nangatanggong sa karsada nga maoy gilikayang mahitabo sa mayor.

“Sa deployment nato nakita gipanid-an nato kay gitahasan sa Mayor ang Cebu City Transportation Office sa higayon nga niabot na sa alas 10 sa buntag kagahapon (Lunes) nga daghan kaayo ang wa pa kasakay. Mipa-deploy tag mga Kaohsiung buses apan dili paigo sa gidaghanon sa pasahero nga na-stranded so ang gibuhat sa Office of the Mayor nitawag sa LTFRB asa naman ang mga bus nga giingong 221?” matud ni Gealon.

Daghang natanggong

Sumala pang Gealon, gilikayan sa mayor nga mangatanggong sa kadalanan ang mga trabahante sa unang adlaw palang sa ilang pagbalik sa trabaho. Sa Executive Order no. 71 ni Labella,  ang public transportation exempted sa coding ug ang mga jeep gitugotan nga makabiyahe.

Apan gumikan kay ubos pa man ang siyudad sa quarantine igo lang sa pagsunod ang Cebu City Government sa IATF guidelines nga nagdili sa tanang mga public utility jeepneys nga makabiyahe kung dili mahatagan og special permit o authority gikan sa LTFRB.

“Nianang tungura nahigot tawon ang kamot sa Mayor kay dili man siya kabuot anang tungura. Beyond sa jurisdiction sa Mayor ang pagpugos sa mga jeep sa pagpagawas bisag wa’y special permit,” si Gealon pa.

Tagsa ka sakong bugas

Miapelar si Labella sa Department of Transportation (DOTr) nga tugotan ang mga jeepney nga makadagan aron makatabang sa pag-transport sa katawhan ug dili maghuot sa kadalanan.

Kini aron sab makapanginabuhi sa mga jeepney drivers tungod kay ni-kooperar man sab ang mga jeepney drivers sa mga protocols.

Apan si LTFRB-7 Regional Director Eduardo Montealto Jr. sa iyang bahin nibutyag wala pa silay gihatagan og special permits sa mga traditional PUJs tungod kay aduna silay gisunod nga tamdanan gikan sa kaulohan.

Matud niya base sa Memorandum Circular 2020-017 ang unang hatagan og special permits nga mga public utility vehicles (PUVs) mao ang mga bus, sunod ang mga modern PUJs.

Tungod kay wala pay tubag sa appeal sa mayor, ang siyudad nanghatag og tagsa ka sakong bugas (50kg) sa usa ka libo ka mga drivers nga taga siyudad aron makatabang kanila.

Ang paghatag og bugas sa siyudad gikalipay og dako sa mga jeepney drivers.

“Kaayo na ana, magpasalamat ta kay dako na kaayo na og ikatabang,” pamahayag sa jeepneyu driver nga si Joel Apostol.

Angkas sa motor

Tungod sa sa lanog kaayong hangyo sa publiko, misuwat pagbalik si Mayor Labella kang Secretary Arthur Tugade sa DOTr nga naghangyo nga tugtan na ang pag-back ride sa motorsiklo ilabi na sa mga immediate families.

“For many households, motorcycles are their only means of transportation to and from home and work as well as in securing basic necessities. Many of our constituents feel they are safer in their own motorcycles rather than having to take public transport services, which are currently operating at reduced capacities during the GCQ. Taking these into considerations, I am respectfully asking your good office to reconsider the “no back rider policy” for those who are transporting their immediate family members,” tipik sa suwat ni Labella. Rowena Capistrano/IBM (BANATNEWS)