Anak gidunggab patay sa amahan nga hubog

CEBU, Philippines — Usa ka amahan ang gipasanginlang niunay og patay sa iyang 24-anyos nga anak nga lalaki kagahapon sa kadlawon diha sa Barangay Bitoon, Lungsod sa Dumanjug.

Ang biktima mao si Rey Vincent Suize ug ang suspetsado giila nga si Reynaldo Suize, 51-anyos, usa ka pintor ug parehong residente sa nahisgutang lugar.

Matud sa hepe sa Dumanjug Police Station Police Major Ardiolito Cabagnot nga hubog nga niabot diha sa ilang balay si Reynaldo kinsa gikan nga nag-inom uban sa iyang mga higala.

Ug tungod sa grabeng kahubog nakatulog si Reynaldo diha sa gawas sa ilang ilang panimalay.

Gikataho nga niadtong higayona ang mga barkada sa usa sa mga anak ni Reynaldo kinsa usa ka menor ang naabot ug naglingaw-lingaw diha sa ilang balay. Si Reynaldo nakamata kini tungod sa kasaba sa mga barkada sa iyang anak ug tungod niini iyang gipangasab-an ug gipapauli.

Giingong si Reynaldo nihulbot kini og hunting knife nga adunay gitas-on nga 13 pulgada aron idunggab unta ngadto sa iyang menor nga anak kinsa nitubag kaniya. Si Rey Vincent niuwang kini sa iyang amahan apan mao na hinuon kini ang gidunggab.

Si Rey Vincent kinsa nakaangkon og samad dinunggaban sa iyang tiyan daling gidala ngadto sa tambalanan sa lungsod apan nakabsan gyud kini sa kinabuhi.

Ang suspetsado nasikop usab kini sa mga polis diha sa ilang balay ug natingkagol karon sa detention cell sa Dumanjug Police Station ug mag-atubang kini og kasong parricide. /BDB (BANATNEWS)