40 positibo sa Mambaling, San Nicolas gibalhin

CEBU, Philippines — Gibalhin na sa mga barangay isolation centers (BIC) kadtong 40 ka mga asymptomatic nga positibo sa coronavirus disease (COVID-19) sa Alaska ug Sitio Ibabao pulos sa Barangay Mambaling sa dakbayan sa Sugbo.

Samtang duha ka positive sab sa Barangay San Nicolas ang gidala na sab sa ilang BIC. Ang mga asymptomatic nagpasabot nga positibo sila sa maong virus apan wala’y sintomas.

“Gikalipay usab sa pipila ka mga residente nga nakuha na gyud kining mga positive patients, nakapawala usab kini sa ilang kahadlok ug kabalaka apan wala kini magpasabot nga karong nakuha na ang mga positive patients gawasnon sila mogawas sa ilang tagsa-tagsa ka panimlay. Hugot gihapon nga atong gimando ngadto sa mga silingan nga mopatuman gihapon sila sa social distancing at the same time dili sila maggawas-gawas sa ilahang mga panimalay kun dili man gani importante,” asoy ni Tumulak.

Ang Mambaling ang dunay kinadaghanan og kaso sa COVID-19 sa Cebu City nga moabot sa 615.

Samtang base sa datos sa Cebu City Health Department kagahapon Mayo 14 ang siyudad adunay 12 ka bag-ong kaso sa COVID-19. Ang bag-ong kaso tulo sa Barangay Suba nga, usa sa Barangay Carreta, laing usa sa T. Padilla, duha sa Duljo-Fatima, ug lima sa Barangay Mambaling.

Duna say duha nga nag lab negative gikan sa Barangay Luz nga gipaubos sa quarantine sa BIC human gihimo ang retest sa mga kompirmadong positibo.

Sa kinatibuk-an ang Cebu City aduna nay 1,699 ka kaso sa COVID-19 hinoon kasagaran niini mga asymptomatic ug nadala na sab sa mga BIC ug giatiman sa Cebu City Health Department. /IBM (BANATNEWS)