Cebu City Hall of Justice gisirado
CEBU, Philippines — Gisirhan sugod niadtong Miyerkules ang Hall of Justice sa Dakbayan sa Sugbo.
Kini ang gipahibalo ni Cebu City Regional Trial Court Executive Judge Macaundas Hadjirasul sa iyang social media post.
Ang Cebu City Hall of Justice sirado sulod sa duha ka semana human adunay contractual worker ang exposed sa Covid-19 positive.
Ang maong contractual worker nga nagpuyo sa CCHJ tungod sa Enhanced Community Quarantine ang nakahimamat og tawo nga positibo sa Covid-19 niadtong adlaw nga Martes.
Sumala pa ni Hadjirasul nga nangayo na siya og permiso sa Supreme Court ug gihatagan sila og pagtugot nga sirad-an ang Hall of Justice.
Gitug-an hinoon ni Hadjirasul ang ang pagsang-at og kaso lakip ang urgent pleadings ug ubang proseso sa korte lakip ang virtual hearing ang ipahigayon online.
Kung mahinumduman ang Cebu City Hall of Justice sa Quimando IT Center sa may North Reclamation Area naglihok pinaagi sa skeletal force diin duha ra ka huwes ang motambong sa usa ka higayon gumikan sa hulga sa coronavirus disease. /GMR (BANATNEWS)
- Latest
