Unom ka polis gi-obserbahan

CEBU, Philippines — Unom ka polis ang g-isolate sa Police Regional Office (PRO7) sugod niadtong Biyernes sa gabii human nga ang bana sa babayeng ilang dinakpan nagpositibo sa novel coronavirus disease (COVID-19) sa Barangay Tejero sa Dakbayan sa Sugbo niadtong Mayo 6.

Matud ni PRO7 Director Police Brigadier General Albert Ferro  motinoron ug i-swab test ang unom ka polis apan magpadayon gihapon sila og trabaho bisan i-isolate sila sa uban diha sa Tejero Elementary School nga gihimong barangay isolation center.

Nahibaw-an nila nga ang bana sa ilang dinakpan bag-ohay lang nahibaw-an nga positibo sa maong virus kauban sa 13 nga nagpositibo sa maong dapit.

Gibutyag sab ni Police Captain Miles Damoslog hepe sa Waterfront Police Station nga unom nga personnel gi-deploy karon sa isolation facility sa maong eskuylahan.

Dugang pa ni Damoslog nga lakip nga gi isolate ang dinakpan niini ug gipaubos sab og swab testing.   Si Cebu City Police Office (CCPO) director Police Colonel Josefino Ligan miingon nga ma monitor sab ang pagkaon ug gihatagan nasab og bitamina aron sa pagpalig-on sa ilang immune system ang maong mga polis.

Sa kinatibuk-an 65 ka personnel sa Cebu City Police Office ang gi swab test lakip na si Ligan ug nag negatibo kini. /IBM (BANATNEWS)