Sobra 1,000 ka motor na-impound

CEBU, Philippines — Miabot na og kapin usa ka libo ka mga motorsiklo ug mga pribado nga sakyanan ang na impound sa Cebu City Transportation Office sulod sa buwan sa Abril tungod sa paglapas sa mga lagda sa trapiko samtang gipatuman ang enhanced community quarantine sa siyudad.

Matud pa ni John Paul Amores ang Public Information Officer sa communications and electronics sa CCTO, sulod sa buwan sa Abril nakatala sila og 1,497 ka mga motorsiklo, 64 ka pribadong sakyanan, usa ka PUJ, upat ka truck/trailer, 21 ka trisikad, duha ka E-bikes ang na impound tungod kay Expired Registration, No Registration ug Driving without License.

Sumala pa ni Amores, ilang giawhag karon ang mga tag-iya sa na-impound sa paglukat na aron dili ma apply ang storage fee ngadto sa mga impounding area. Gitug-an ni Amores, daghan sila nabantayan nga adunay mga sakyanan nga sige ra ug dagan bisan walay igong mga dokumento.

Ang CCTO nagpasalamat sa tanang 11 ka mga police stations sa Dakbayan sa Sugbo nga niabag sa ilang pagpatuman sa balaod sa trapiko ug paghan-ay niini ./IBM (BANATNEWS)