Priso naghikog sulod sa CR

CEBU, Philippines — Usa ka dinakpan sa Criminal Investigation and Detection Group (CIDG)-7 ang naghikog kagahapon sa kadlawon.

Ang naghikog mao si Fidel Rivera, 57-anyos, taga Barangay Catarman Lungsod sa Liloan.

Matud ni Police Major Roland Allan Toloso, deputy chief sa CIDG-7 nga pasalado alas 4:00 sa kadlawon si Rivera nananghid nga mag-CR.

Si Rivera kinsa adunay warrant of arrest sa kasong murder ang nasikop niadtong Mayo 2, 2020 ug temporaryong gibutang sa  conference room sa CIDG-7 aron malikayan nga magdug-ol kini sa una nilang dinakpan paglikay sa covid-19

Ang polis nga nagbantay sa gawas sa CR dugay-dugay kining naghuwat ug nakapaniid nga namingaw ang sulod sa CR hinungdan nga gipugos nila sa pag-abli ang pultahan.

Ug pag-abli sa pultahan nasugat sa panan-aw sa polis si Rivera nga nagbitay na gamit ang leather belt nga gihigot sa iyang liog ug ang pikas tumoy niini gikutay ngadto sa tubo sa shower. Giingong si Rivera sa wala pa maghikog nag-hallucinate kini nga dunay mopatay kaniya.

Usa usab nga gilantaw ni Tolosa nga naguol si Rivera tungod kay walay niduaw niini nga kabanay. /BDB (BANATNEWS)