Coastal barangays pabantayan

CEBU, Philippines — Gimando karon sa kapolisan ang hugot nga pagbantay sa mga coastal barangays aron malikayan ang patago nga paglayas sa mga tawong nagpuyo sa mga barangay nga dunay daghang kaso sa coronavirus (COVID-19) human nga dunay duha ka magsuon ang giingong miikyas sakay og pumpboat padung sa Bohol.

Ang duha nga milusot paingon sa lungod sa Inabanga sa Bohol niadtong Mayo 2 sa gabii gamit ang pumpboat nga nanukad sa lungsod sa Cordova kinsa maoy pinakaduol nga lugsod palabang sa Bohol.

Giila ang duha nga silang Maria Jonalie Nioda Bautista 33, ug John Virgil Nioda 30, nga usa ka security guard. Ang duha gidakop sa mga polis pagabot diha sa Brgy. Fatima sa Inabanga tungod sa kalapasan sa Enhance Community Quarantine.

Ubos sa ECQ sa dakbayan sa Sugbo ug sa lalawigan sa Sugbo, gidili ang pagbiyahe sa mga tawo pagawas sa isla sa Sugbo aron dili makatakod sa maong sakit kun pananglitan nataptan na niini.

Ang duha lumulupyo sa Barangay Labangon sa Dakbayan sa Sugbo. Ang maong barangay gipaubos sa lockdown ni Barangay Labangon Captain Victor Buendia tungod sa kadaghan sa mga nataptan sa coronavirus ilabi na sa Sitio Callejon. Matud ni CCPO Director Police Colonel Josefino Ligan mopahigayon sila og imbestigasyon kun giunsa nga nakalusot ang duha sa mga checkpoints gikan sa Cebu City padung sa Cordova ug nakatabok padung sa Bohol.

Baybayon bantayan

Matud niya kinahanglan nga bantayan kinsa kining mga tawong mogawas sa barangay ilabi na sa mga daplin sa dagat aron dili makabiya paingun sa laing probinsya.

Giawhag ni Ligan ang mga coastal barangays sa paghimo og kaugalingong sistema aron mabantayan ang ilang baybayon sa mga tawong mogawas ug modunggo gikan sa laing lugar.

"Magbuhat sad sila’g sistema in how to guard the shorelines. So, from there we will be tapping the cooperation of the barangay officials.  We cannot allow these people to go out kay basin mao pa ni hinungdan nga mag spread sa virus hinuon," si Ligan miingon.

Sa Facebook post sa Inabanga, ang managsuon pulos lumad sa maong barangay sa Inabanga. Ang duha pasakaan og kasong paglapas sa  RA 11332, 9271 and Art. 151 sa Revised Penal Code. Iris Hazel M. Mascardo /IBM (FREEMAN)