Sitio sa Carcar City gi-lockdown

CEBU, Philippines — Gipaubos sa lockdown ang usa ka sitio sa Barangay Guadalupe, Dakbayan sa Carcar.

Kini human nga natala ang unang kaso sa novel coronavirus (COVID-19) sa maong lugar.

Matud ni Cebu Provincial Police Office Director Rhoderick Mariano nga kasamtangan nga gikordon sa kapolisan ang sitio diin nagpuyo ang usa ka 17-anyos nga lalaki nga namatay ug nagpositibo sa maong sakit.

Dugang pa ni Mariano nga sa ilang pagsusi nga niadtong Abril 23 gidala sa Vicente Sotto Memorial Medical Center ang 17-anyos tungod sa problema sa sakit sa kidney.

Nasayran sab nga ang ward diin gipahiluna ang bata duol sa ward sa giingong adunay seryuso nga kaso sa COVID-19.

Hinuon padayon karon ang pagpahigayon sa contact tracing sa kapolisan lakip na sab niini ang pagkordon sa sitio ug panimalay sa bata. Nunot niini mas gipahugtan sab sa CPPO ang pag-monitor sa mga gipatuman nga checkpoints sa Probinsiya sa Sugbo.

Kini human nga adunay report nga nadawat si Gobernador Gwendolyn Garcia kalabot sa giingong pagpasakay og mga tawo sa mga sakyanan sama sa ambulansiya, armored car ug uban pa paingon sulod ug gawas sa probinsiya.

Nibahad si Mariano nga tiketan ang mga drayber nga mopahimulos sa higayon ug pasakaan sab og kaso ang mga tawo nga mosupak gyud sa gipatuman nga istriko nga Enhanced Community Quarantine sa Probinsiya sa Sugbo. /GMR (BANATNEWS)