Frasco dunay COVID hotline

CEBU, Philippines — Gilusad ni Kong. Vincent Franco “Duke” Frasco ang hotline alang sa mga residente sa ikalimang distrito nga wala kadawat og hinabang sa gobiyerno nunot sa enhanced community quarantine.

Ang COVID-19 HOTLINE nga numero 0908-354-0240 maoy matawgan sa katawhan nga manginahanglan og tabang sama sa mga public utility drivers, gagmayng mga negosyante, Overseas Filipino Workers (OFW) ug ubang pang apektado sa Covid-19.

Mahimo sab nga makapadala og mensahe sa [email protected].

Ang buhatan ni Frasco motbang sab sa mga panginahanglang sa Bureau of Internal Revenue’s Small Business Wage Subsidy Program ug sa programa sa Department of Transportation.

Sayo niini ang mga molupyo sa 10 ka lungsod ug usa ka siyudad sa ikalimang distrito ang nakadawat na og relief packs nga dunay sulod masks, bugas ug de lata gikan ni Frasco.

Sa niaging semana si Frasco pinaagi sa Frasco Foundation nidonar sab og dugang 1,000 ka sakong bugas alang nga gipangapod-apod sa mga apektado sa ECQ sa Danao City, Liloan, Compostela, Carmen, Catmon, Sogod, Borbon ug upat ka lungsod sa Isla sa Camotes.

“Akong panghinaut na kining tabang na atong gihatag makapahinumdum sa katawhan na dili angay mawad-an ug paglaum, na wala sila nag-inusara sa pag-atubang niining dakung krisis. Ug pamaagi sa atong pagtinabangay, maluwas kita niini,” matud ni Frasco.

Ang mga porma, listahan sa mga gikinahanglan sa ayuda ug paagi sa pagkuha niini anaa sa official Facebook page ni Frasco ug anaa sab sa iyang buhatan sa distrito. – Gregg M. Rubio

Dunol alang sa mga piniriso gihunong

Gikanselar na ang “dunol drop off” para sa mga Persons Deprive of Liberty sa Cebu City Jail sa Fuente Osmeña Circle sugod karong adlawa.

Kini aron dili ma-enganyo ang katawhan nga mogawas sa ilang panimalay aron sa pagdunol.

Ang paghunong sa dunol alang kini sa proteksyon ug kaayuhan sa mga pamilya sa PDL ug sa mga jail officers.

Matud ni Cebu City Jail Warden Male Dormitory, Col. Julius Arro, nga nahukman ang paghunong sa dunol kay daku ang posibilidad nga ma-contaminate sila ug makapuno pa hinoon sa problema.

Malaumon si Arro nga masabtan sa kadaghanan nga pamilya sa mga PDL ang ilang paghunong sa dunol.

Ang paghunong sa dunol agi usab og suporta sa Bureau of Jail Management and Penology sa gipatuman sa gobiyerno nga enhanced community quarantine nga “stay at home”. /GMR (BANATNEWS)