Mga drayber ug helper sa truck sa Medellin dili una papaulion

CEBU, Philippines — Ang mga drayber sa truck ug helper niini sa Lungsod sa Medellin dili una tugotang makabalik sa ilang panimalay human sa ilang biyahe gikan sa mga Dakbayan sa Sugbo, Mandaue ug Lapu-Lapu.

Si Medellin Mayor Joven Mondigo Jr. niluwat og memorandum ngadto sa mga barangay kapitan nga nag-awhag nga sila maoy mopahibalo sa mga negosyante, drayber ug helper sa ilamg barangay nga kon ugaling mobiyahe ang truck sa mga highly urbanized cities o sa mga lugar nga adunay kaso sa coronavirus disease (covid-19) dili una papaulion sa ilang panimalay.

"Kinahanglan ang driver ug helper adto na mopuyo sa isolation center kada barangay nga nahimutang sa mga eskwelahan samtang magpadayon pa ang enhanced community quarantine", tipik sa memorandum ni Mondigo.

Hinuon makapadayon ra gihapon og drive paghakot o kuha sa kargamento ang maong mga drayber ug helper.

Si Mondigo niluwat sa maong kamandoan tungod kay nabalaka ang mga residente sa Medellin nga moabot sa ilang lungsod ang maong sakit o adunay mataptan sa virus.

Sa tibuok isla sa Sugbo ang Cebu City, Mandaue ug Lapu-Lapu maoy adunay daghang kaso sa covid-19. /BDB (BANATNEWS)