Merkado nabulabog sa tabanog

CEBU, Philippines — Nabulabog ang mga mamalitay ug mangomprahay sa Barangay San Roque, Dakbayan sa Talisay human ang tabanog nasangit sa kuryente niadtong Domingo sa hapon.

Si Konsehal Ferdie Rabaya nga molupyo sa maong dapit nag-post sa iyang social media account ug nanawagan sa mga nagtabanog nga unta moundang na niini.

Iyang gihulagway nga nagdinaganay ang mga tawo human nasangit sa live wire ang tabanog nga maoy hinungdan sa pagsilaob sa kayo.

Nakamugna og “panic” sa katawhan ang panghitabo ingon man kahasol tungod kay napawong ang ilang kuryente.

Wala makatiwas sa pagpangompra ang mamalitay samtang ang ubang mamaligyaay sayo nga nanghipos sa ilang paninda.

“Ang gawong sa inyong tabanog alambre man inyong ibutang una pa ang tugot nga nylon kahibaw ko para na sa bitik2x..bitkanay ug tabanog. Tinuod lingaw na pero nakahimo tawn mo ug kahasol sa mga tawo ug disgrasya,” tipik sa post ni Rabaya.

Dali ra sab hinuon napawong ang kayo human girespondehan sa kabomberohan. /GMR (BANATNEWS)