Mga polis hatagan og accident insurance sa probinsiya

CEBU, Philippines — Nikabat sa 1,600 ka polis nga nagmando sa mga checkpoint diha sa kadalanan ang hatagan og P500 mil nga accident insurance matag usa sa kagamhanan sa Probinsiya sa Sugbo. Kini ang gibutyag sa direktor sa Provincial Police Office (PRO)-7 Police Brigadier General Albert Ferro.

Si Ferro mapasalamaton kini sa suporta nga gihatag sa mga lokal nga kagamhanan ngadto kanila ilabi na sa Probinsiya sa Sugbo.

Sayo pa, si Gobernador Gwendolyn Garcia nipadayag nga mohatag sa nahisgutang accident insurance sa kapolisan sa probinsiya.

Matud ni Ferro nga si Garcia nihatag og P500 mil nga accident insurance sa matag polis sa Cebu Provincial Police Office ug naghatag usab kini og libre nga bakuna batok sa flu isip panagang sa novel corona virus (covid-19) ngadto sa mga polis. “The Police Regional Office-Central Visayas (PRO)-7 is wholeheartedly thanking local chief executives who continue to provide the much-needed support in our efforts to stop the spread of coronavirus disease 2019. We especially express our utmost gratitude to Cebu Governor Gwendolyn Garcia who has shown her untiring support to our police personnel”, matud ni Ferro. Gikatahong gihinay-hinayan na usab og hatag og flu vaccine ang mga polis ug giingong giproseso na usab ang ilang enrollment sa accident insurance.

Si Ferro nipasalig nga ipadayon nila ang pagprotekta ug paghatag og serbisyo ngadto sa katawhan.

Gihangyo ni Ferro ang katawhan nga magpundo sa ilang mga balay diin dako kaayo kining tabang kanila aron mapugngan ang pagkatap sa virus. /BDB (BANATNEWS)