Tindahan sa Kapitolyo anaa na sa kalungsuran

CEBU, Philippines — Gisugdan na sa Probinsiya sa Sugbo ang pagbukas sa Tindahan sa Kapitolyo sa dili mominus siyam ka lungsod.

Niadtong Lunes unang gibuksan ang Tindahan sa Kapitolyo sa Lungsod sa Ronda, Alcantara, Borbon, Sogod ug Sta. Fe sa Isla sa Bantayan.

Nisunod ang Poro, Ginatilan ug Tabogon niadtong Martes ug kagahapong adlawa sa Aloguinsan ug Samboan.

Ang Tindahan sa Kapitolyo anaa kini nahimutang sa mga covered courts sa lungsod diin anaa mamahimong mapalit ang mga basic nga panginahanglanon sa mas barato nga presyo o ubos og 10 porsyento kun itandi sa mga sari-sari store sama sa NFA nga bugas nga kun sa ubang tindahan P25 matag kilo ang presyo walay labot ang ganansiya apan sa Tindahan sa Kapitolyo tag P22.50 ang presyo matag kilo.

Apil usab nga baligya ang ubang basic commodities sama sa asukal, suka, toyo, mantika, de lata ug uban pa. Anaa usab ang mga utanon sanglit ang Tindahan sa Kapitolyo mahimo sab nga bagsakan center sa mga mag-uuma sa ilang mga baligya.

Matud ni Gobernador Gwendolyn Garcia nga ubos ang presyo sa mga palaliton sa Tindahan sa Kapitolyo kun itandi sa price ceiling mga gitakda sa Department of Trade and Industry gumikan kay gi-subsidize kini sa probinsiya.

Matud ni Garcia nga tabang na usab kini sa Kapitolyo ngadto sa mga kabus nga Sugboanon aron makapalit ilabi na karon nga anaa sa enhanced community quarantine ang tibook lalawigan tungod sa coronavirus disease.

Dili moubos sa 20 ka lungsod nga walay dagkung tindahan o supermarket o layo sa dagku nga tindahan ang butangan sa Tindahan sa Kapitolyo aron adunay dali nga kapalitan ang mga tawo. /GMR (BANATNEWS)