20 ka LGU himuong pilot area sa Bagsakan Center

CEBU, Philippines — Mga 20 ka lungsod sa Lalawigan sa Sugbo maoy himuon nga pilot area alang sa Bagsakan Center o Tindahan sa Kapitolyo sa sunod semana.

Matud ni Gobernador Gwendolyn Garcia ang maong mga lungsod maoy mga 4th ug 5th class nga munisipalidad diin sila ang unahon sa pagbutang sa bagsakan center.

Ang mga gagmay nga lungsod wala kini madaganan nga mga grocery o supermarket.

Ang nahisgutang mga bagsakan center anha kini ipahimutang sa mga covered court sa mga lungsod diin ang mga residente makapalit og mas barato nga palalation sa basic commodities sama sa bugas, delata, asukar, sabon ug uban pa.

Ang Kapitolyo nakaandam na kini og 13mil ka sako nga NFA rice diin P1,250  ang palit sa matag sako niini nga maoy ibaligya diha sa kalungsoran subay sa price ceiling nga gipatuman sa ubang basic commodities.

Matud ni Garcia nga “transparent” sila sa ilang pamalit sa panginahanglan ngadto sa mga LGU gikan sa bugas hangtud sa Personal Protective Equipment (PPEs).

“We will render a full accounting for all these purchases”, matud ni Garcia.

Nunot niini, giawhag usab ni Garcia ang mga dagkong kompaniya nga kong aduna silay hinabang dili na kinahanglang moagi pa sa probinsiya diin mamahimo ra kining mo- adopt og LGU aron mahimong beneficiary sa ilang donasyon. – Le Phyllis F. Antojado/BDB

P30 mil kada semana ihatag matag barangay sa Talisay

Gipahibawo ni Mayor Gerald Anthony “Samsam” Gullas Jr. sa Siyudad sa Talisay nga ilang gipaningkamotan nga makahatag og bugas sa mga nagkinahanglan hangtud sa tapos buwan.

Matud ni Gullas nga kadtong mga mas nagkinahanglan gyud ang ilang gi-una, kadtong mga nawagtangan og trabaho, senior citizen ug mga Person With Disability (PWD).

Gibutyag ni Gullas nga nigahin sila og tag P30mil kada semana sa matag barangay samtang ang barangay na usab ang mopuno niini aron mahatagan ang mas nagkinahanglan.

Nagsugod ang paghatag og bugas niadtong Marso 25, 2020. Si Gullas nipadayag sa iyang paghangop sa pipila ka indibidwal kinsa nipaambit sa ilang hinabang diin ilaha usab nga giapod ngadto sa mga nagkinahanglan.

Ang opisyales sa barangay mao nay mangita og paagi sap ag-apod-apod sa mga hinabang diin kinahanglang ipatuman gyud ang social distancing.

Sa laing bahin, mokabat ngadto sa 250 mil ka Pantawid Pamilyang Pilipino Program (4Ps) sa Central Visayas ang nakadawat sa ilang cash grants niadtong Huwebes.

Samtang ang cash grants usab sa dul-an sa 13 mil ka mga beneficiaries sa Modified Conditional Cash Transfer (MCCT) ang na credited na niadtong Marso 24, 2020.

Ang MCCT usa ka sub-component sa 4Ps nga naggamit og modified approach alang sa pag-implementar sa conditional cash transfer program alang sa kabus nga pamilya nga naglangkub sa homeless street families, indigenous peoples ug families in need of special protection.

Ang grants gisulod pinaagi sa Europay, Mastercard ug Visa ug makuha bisan asa nga sanga sa Land Bank of the Philippines Automated Teller Machines o bisan asa nga ATM.

Ang mga empleyado sa Department of Social Welfare and Development (DSWD) Field Office VII ug City/Municipal Links and City/Municipal Roving Bookkeepers nag-obserbar usab sa tukmang pagpahigayon sa payout uban sa koordinasyon sa Philippine National Police.  Rowena D. Capistrano/BDB (BANATNEWS)