Duha ka pinuy-anan gipabantayan ni Chan
CEBU, Philippines — Duha ka mga balay sa Dakbayan sa Lapu-Lapu ang gimando nga i-lockdown ni Mayor Junard Chan nunot sa gikatahong adunay mga nagpuyo nga positibo sa coronavirus COVID 19.
“Within the five meter radius sa ilang balay dili na kagawas, naka-cordon na ang area. Ug naa nay police nga nagbantay sa area,” matud pa ni Chan sa iyang pamahayag.
Gibutyag niya nga ang duha ka mga paseyente gi-isolate na sa tambalanan sa Dakbayan sa Mandaue ug Dakbayan sa Sugbo samtang ang city’s COVID-19 management team ang naghimo na og contact-tracing sa mga tawong nakauban sa duha.
Ang unang pasyente nag-edad og 70 anyos nga dunay gihambing balatian. Giingong doktor ang anak niining lalaki.
Samtang ang ikaduhang pasyente nag-edad og 74 anyos nga lalaki kansang asawa usa usab ka doktor.
Gitataw niya nga ang tanang nagpuyo sa sulod sa maong compound higpit nga gi-monitor.
“Kung naay mag-positive, kinahanglan imo sa’ng i-secure and area. Kay og imong i-announce ahead, naay tendency nga ang mga tawo manglayas. So kung molayas siya, mobalhin siya og laing lugar. Wa ka kahibawo ug kadto siya naigo nato siya makatakod na hinoon siya sa laing lugar,” dugang pagpasabot sa mayor.
Sa pikas bahin, nagkasabot ang mga mayor sa Cebu City, Mandaue ug Lapu-Lapu nga dili na pangitaan og ECQ pass kadtong mga naapil sa listahan sa mga exempted ug palutson diha sa mga checkpoints.
Si Mayor Jonas Cortes sa Mandaue mipagawas og memorandum ngadto
kang Police Colonel Jonathan Abella, direktor sa Mandaue City Police Office (MCPO) nga palutson ang mga naapil nga exempted nga dili pangitaan pa og ECQ pass. Nagkinahanglan lang nga mopresentar sila og ID nga nagpamatuod nga kawani sila sa kompanyang naapil sa exemptions. /IBM (BANATNEWS)
- Latest
