Nganong gamay ra ang ECQ passes
CEBU, Philippines — Miapelar si Cebu City Mayor Edgardo Labella sa mga molupyo ug sa opisyales sa barangay nga magpabiling kalma ug patas-an ang pailob sa pagpangapud-apod sa enhanced community quarantine (ECQ) pass.
Kini human nga giulan og mga pagsaway ang distribusyon niini diha sa social media tungod kay daghan ang wala mahatagi ug may mga pasangil nga pinili ra ang gihatagan ilabi na ang mga kadugo sa mga opisyales.
“Karon lageng panahona, magsinabtanay gyud unta ta. Di lang ta karon magmugbo og pasensya. Magpasensyahay ta kay this is the first time that we have this kind of problem,” awhag pa sa mayor.
Ang pagpanghatag niini molanat og lima ka adlaw ayha pa higpitan ang paggamit niini. Apan masaligon ang mayor tanang pamilya makabaton niini.
Miesplikar si Konsehal Raymond Alvin Garcia nga gituyo ang pagpagamay sa gidaghanon sa ECQ passes aron limitahan ang gidaghanon sa mga tawong magawas-gawas.
“If you have a population of Cebu City of one million, di ka ganahan nga ang one million magsige’g suroy-suroy,” matud pang Garcia tungod kay dako ang purohang magkatakdanay sa maong virus.
“Mao na nga nag-issue ta og 250,000 green passes kay para instead of one million nga magsige’g suroy-suroy, 250,000 nalang. Og magsige lang ta og add og pass, dili nato i-limit... What’s going to happen? Mas modaghan gihapon ang tawo, mas modaghan gihapon og takod ang mga tawo,” dugang pa sa konsehal. Matud niya, usa ra gyud ka ECQ pass matag pamilya.
Upat ka klase ang ECQ passes depende sa katuyoan sa kolor niini. Ang mga residente sa siyudad green; pula sa mga opisyales ug kawani sa gobiyerno; blue sa mga di residente; ug puti sa crisis management teams ug frontliners. /IBM (BANATNEWS)
- Latest
