Mayor Cortes: Dili magpataka og palit og mga testing kits

CEBU, Philippines — Si Mayor  Jonas  Cortes ang nipahimangno sa mga establisamento nga mag-atubang  sa pagbakwi  sa ilang business permit kon masuta nga nagpasiugda kini sa pagbaligya diha sa online sa mga coronavirus disease (COVID-19)  test  kits nga wala marehistro ug nag-overcharging pa  sa presyo niini.

Si Cortes nibahad nga dili kini magpanuko sa pagpahamtang og silot ni bisan kinsa nga nagpahimulos sa  panginahanglan karon  sa publiko taliwala  sa pagtumaw  pandemic nga covid-19.

Nunot niini, gi-discourage ni Cortes ang katawhan  sa pagpalit sa maong mga coronavirus test kits alang sa ilang kinaugalingon nga paggamit  sanglit dili man masiguro ang magawas unya nga resulta niini.

“You might be a carrier of the virus, but after using the test kit, you get a false negative result and you become complacent. Unya makatakod ka na hinuon ngadto sa laing tawo” matud ni Cortes.

Si Cortes niawhag sa mga nakasinati og mild-flu like symptoms sa pagpabilin lamang sa sulod  sa ilang panimalay alang sa pagpugong nga mokuyanap ang virus. Giklaro ni Cortes nga ang Research Institute for Tropical Medicine (RITM) mao  lang ang adunay  kahanas  ug  kapasidad sa pagahimuon nga pagsusi sa covid-19 testing ug adto pagabuhaton  sa laboratory.

Samtang si Dr. Jaime Bernadas, direktor sa Department of Health (DOH)-7 nagkanayon nga ang Vicente Sotto Memorial Medical Center (VSMMC) lang ang kwalipikado nga mohimo sa covid-19 tests.

“All tests for covid-19 are laboratory-based since these are PCR or polymerase chain reaction tests that can only be done by level 2 or level 3 hospital. It cannot be conducted elsewhere”, dugang ni Bernadas. /BDB (BANATNEWS)