11 wanted nitahan sa kapolisan
CEBU, Philippines — Pag-umangkon ni Mandaue City Mayor Jonas Cortes ug usa ka doctor sa mata ang kauban sa 11 nga mitahan sa Cebu City Police Office (CCPO) City Mobile Force Company nga mga wanted persons sa mga Dakbayan sa Sugbo, Mandaue, Lapu-Lapu ug lungsod sa Cordova sulod sa tulo ka adlaw nga operasyon.
Kini subay sa gipahigayon nga Oplan Xenon kun diin nagpahigayon og simultaneous operations ang kapolisan sa pag-serve og warrant.
Lakip nga mi surrender ang pag-umangkon ni Mayor Cortes nga si Leumel Cortes nga adunay kaso nga frustrated murder.
Matud ni Police Lieutenant Colonel Randy Korret ang Force Commander sa CMFC nga daghan silang nadawat nga tawag sa mga tawong gustong itahan ilang mga tinagoang armas ug aduna sab nangutana kung mamahimo ba sab nga sa ila mo surrender ang adunay mga warrant of arrest.
Sa kinatibuk-an 11 ka mga personalidad ang mitahan sa CMFC anang mga adlawa.
Lakip na nitahan ang kanhi City Parks and Playground Administrator Dr. Librando Macaraya kinsa dunay giatubang nga kaso ug nalutsan og warrant of arrest.
Gawas sa mga most wanted aduna sab 11 ka armas ang gitahan sa 10 ka bukirang barangay sa Dakbayan sa Sugbo.
Kini gilangkuban sa 3- units nga improvised shotgun, 1- unit sa .22 rifle, 4-units .38 revolver, ug 2-units .375 revolvers.
Gibutyag ni Korret nga aduna pay liboan ka mga pending warrant of arrest nga ilang i serve sa mosunod nga mga adlaw. /IBM (BANATNEWS)
- Latest
