Avian flu nga H5N6 gibantayan
CEBU, Philippines — Gi-monitor sa Provincial Veterinary Office ang mga poultry farms sa Lalawigan sa Sugbo nunot sa outbreak sa Avian influenza sa Nueva Ecija.
Matud ni Dr. Mary Rose Vincoy, provincial veterinarian, nga naghuwat sila karon sa report sa mga local government units kalabot sa surveillance nga gihimo niini.
Usa sa gitutokan nga lugar sa PVO mao ang Isla sa Bantayan tungod kay gihulagway kini nga risk area.
Si Vincoy nagkanayon nga ang niigo nga Avian influenza sa Nueva Ecija mao ang H5N6.
“This strain is highly pathogenic which is zoonotic, meaning it has a potential to transfer to humans,” matud ni Vincoy.
Hinoon matud niya nga ang sintomas sa tawo susama ra sa flu.
Ang Avian influenza niigo na sa Nueva Ecija sa tuig 2017 apan walay tawo nga natakdan.
Si Vincoy nagkanayon nga han-ay na hinoon ang protocols sa gobiyerno kun adunay outbreak sa maong sakit diin kinahanglan patyon ang manok ug ang tibuok binuhi sa usa ka manokan kun adunay kaso na sa Avian influenza.
Dili na usab makasulod sa Probinsiya sa Sugbo ang mga manok nga gikan sa apektado nga lugar sa H5N6.
Sa pagkakaron walay H5N6 nga kaso sa Sugbo apan nanghinaut si Vincoy nga dili moabot ang maong sakit dungan sa awhag ngadto sa mga tag-iya og poultry farm nga mo-report dayon sa ilang buhatan kun adunay mortalities sa manok. /GMR (BANATNEWS)
- Latest
