Inasalan sa Talisay nagmingaw

CEBU, Philippines — Nagmingaw ang inasalan sa Dakbayan sa Talisay sugod kagahapon.

Ang mga manindahay og inasal ingon man seafoods ug uban pang produkto nipasangil sa pagkuyanap sa makamatay nga coronavirus disease (COVID-19).

Naandan nga matag Sabado ug Domingo daghan ang mangaligo o mokaon lang sa inasal ug ubang produkto daplin sa dagat sa Larawan.

Apan ang mga tindera ug tindero nakalitan sa kalit nga pagkaubos sa gidaghanon sa mga mamalitay.

Si Nora, usa sa mga tinder, nibutyag nga imbis makahurot sila og tag 15 ngadto sa 20 ka baboy sa matag Domingo, kagahapon naglugos pa sila sa paghurot sa 10 ka inasal.

Ang namaligya sab og mga kinilaw, barbeque ug uban pang seafoods nidason sa susamang sentimento.

Gani lakip ang tig-parking sa motor ug sakyanan naapektahan niini.

Matud ni Mokon Tabelon nga ila gyud nga nabati ang epekto sa COVID-19 kay minus kaayo ang nisuroy sa Barangay Poblacion aron mangaon og lamiang lechon.  Hinoon ang kadaghanan sa mga negosyante nitataw nga hinay-hinay nalang sila sa pag-agwanta kay nisabot ra man sila sa sitwasyon.

“Hinay-hinay lang ta ani og kamang. Mag-ampo lang ta nga madali ang pakakita og tambal aning COVID-19,” matud ni Nora. /GMR (BANATNEWS)