Driver ug mga pasaherong angol sa bangga luwas na

CEBU, Philippines — Anaa na sa luwas nga kahimtang ang drayber sa usa ka Van nga midasmag sa bus niadtong Biyernes sa buntag sa Barangay Ipil-Ipil lungsod sa Compostela.

Kini maoy gikumpirmar ni Police Captain Vincent Zozobrado nga anaa na sa luwas nga kahimtang si Patrick Tulo human nga gidala kini sa tambalanan human nga kritikal ang kondisyon.

Dugang pa ni Zozobrado nga human sa gipahigayon nga imbestigasyon kusog ang pagpadagan sa maong drayber maong gi-hospital arrest kini sa kapolisan.

Gibutyag sab ni Zozobrado nga nakaangkon samad sa nagkalain-laing parte sa lawas si Tulo ug nabali ang abaga niini tungod sa grabing impact sa pagkabangga. Luwas nasab ang kahimtang sa lain pang pasahero nga sila Lord Ian Igot, William Lasandera, ug Mark Briones. Kasong Reckless Imprudence resulting to multiple homicide ang atubangon ni Tulo ug ang drayber sa bus nga si Jerry Lubon.

Kahinumduman nga nadisgrasya ang bus ug van human nga mi overtake si Tulo kang Lubon samtang kini paingon unta sa Dakbayan sa Sugbo. Imbestigahon sab sa kapolisan ang kompanya human nga gitugutan gihapon nila pagpabalik nga makamaneho si Tulo bisan nalambigit na kini og aksidente sa lungsod sa Catmon niadtong tuig 2018.  /IBM (BANATNEWS)