Nanguha og bas gipusil, angol

CEBU, Philippines – Nalandig sa tambalanan ang 46-anyos nga lalaki human kini gipusil sa may Sitio Kalyehon, Labangon, Dakbayan sa Sugbo alas 6 sa gabii niadtong Domingo.

Ang biktima naila nga si Roger Gica, minyo, ug residente sa maong lugar samtang ang mamumuno wala pa nailhi.

Base sa pamahayag sa inahan sa biktima nga si Elizabeth Gica, giingong adunay kalalis ang iyang anak nga maoy gituohan niyang nagpusil niini.

Ang biktima giingong nagtrabaho pa kini sa pagpanguha og bas sa sapa dihang gikasugat niini ang gikalalis nga maoy nipusil kaniya ug maoy nadunggan sa mga silingan ug sa manghud niini ang paka sa buto sa armas.

Matud sa inahan nga nakita sa lain niyang anak ang maguwang niini nga si Roger nga naligo sa kaugalingong dugo ug buot tiwasan sa mamumuno ug gihangyo kini nga dili na pusilon pag-usab ug nagpakitabang na kini sa mga silingan.

Ang biktima dali nga gidala sa Cebu City Medical Center ug nagpaalim sa iyang samad pinusilan sa iyang tiil.

Ang mamumuno nailhan sa pamilya sa biktima ug nakig-alayon pa sila sa kapolisan kinsa nihimo pa karon sa imbestigasyon may labot sa pagpamusil. /GMR (BANAT NEWS)