Summer league ipahigayon sa Talisay

CEBU, Philippines — Ipadayon ni Talisay City Mayor Gerald Anthony “Samsam” Gullas Jr. ang mga kalihukan sa matag barangay sama sa summer league alang sa kabataan gumikan sa nagsingabot nga bakasyon.

Apan si Gullas nihangyo nga kung aduna silay ipahigayon nga duwa sa nagkalain-laing sports event sa ilang barangay kinahanglan nga ipatuman nila ang mga guidelines aron nga malikay sa bisan unsa nga sakit.

Iyang gipasabot nga sa pagsibaw sa makamatay nga coronavirus disease siya nabalaka ug nihangyo nga dili lang una magpahigayon og kalihukan nga dugukan sa katawhan.

Gani daghan sa mga opisyal sa Sangguniang Kabataan ang nipahibawo na sa ilang mga sakop nga ikanselar nila ang ilang mga programa nga makapatapok sa katawhan.

Daghan ang nagguol kay mao kini ang gipaabot sa mga batan-on sa matag tuig nga sila makapakita sa ilang nagkalain-laing abilidad.

Apan sa kalambuan nga nadesisyonan ni Gullas daghan ang nalipay.

Si Gullas niklaro nga dili pa hingpit ang iyang desisyon kay magdepende gihapon kini sa saktong ahensya sa gobiyerno labot sa sitwasyon sa maong virus sa nasud. /GMR (BANATNEWS)