3 menor nieskapo sa OSC

CEBU, Philippines – Sa ikaupat ka higayon, naeskapohan na sab ang Operation Second Chance sa Brgy. Kalunasan sa Dakbayan sa Sugbo ug ning higayona tulo ka mga batang giatiman sa maong institusyon ang nangikyas.

Nitabang na karon ang Cebu City Police Office sa pagpangita sa tulo. Matud pa ni CCPO Deputy City Director for Administration Police Lieutenant Colonel Melbert Glade Esguerra gisubay nila ang mga dapit nga posibleng tagoan sa maong mga bata.

Nasayran nga ang tulo adunay mga kasong kalambigitan sa illegal nga drugas ug silang tulo pulos taga Barangay Duljo-Fatima ug Mabolo ning dakbayan.

Ang CCPO magbutang na og dugang polis aron tabangan ang mga nagbantay nga blue guards sa OSC.

Gipanawagan niya ang mga ginikanan sa tulo nga sila mismo personal nga mouli sa ilang mga anak ngadto sa OSC kung mouli sila sa ilang mga balay.

Nagpabukal

Ang hepe sa Guadalupe Police Captain Janelito Marquez, nitug-an nga lima ka mga batan-on ang nieskapo, apan na rescue nila ang duha sa dihang ilang gisusi ang lugar dili layo sa OSC.

Gitug-an ni Marquez anaa sa pangidaron nga 16-anyos ang mga nakaeskapo.  Base sa ilang imbestigasyon, giingong mihangyo ang maong mga bata sa ilang guardians o house parents nga mag-init og tubig.

Apan sa dihang giablihan sa guardian ang pultahan nikaratil og panagan sa main gate ang mga bata ug nangatkat sa napulo ka tiil nga kural padung sa gawas.

Si Marquez miingon nga kadtong duha nga ilang nadakpan pagbalik nakaangkon og mga samad ug bun-og tungod sa pagkatkat ug paglayat gikan sa kural. Ang duha wala motug-an kun unsa ilang rason nganong sila nangikyas.

Makaduda na

Si Cebu City Councilor Dave Tumulak, Chairman sa Committee on Disaster Risk Reduction Management miingon nga makapaduda na ang pagdumala sa OSC kay ikaupat na kini nga naeskapohan ubos sa parehas nga administrador.

Lunes sa gabie giingong dunay komosyon nga nahitabo sa pasilidad.

“Makapaduda gyud kay sagunson naman gud, ika-upat nani nga incident nga dunay mga kasamok nga nahitabo diha sa Operation Second Chance, supposedly ang Operation Second Chance, second house ni sa atoang nga minors nganong ingon ani man?” asoy ni Tumulak.

Giangkon ni Tumulak nga dismayado gyud siya sa nahitabo ug iyang giawhag ang nagdumala sa maong pasilidad nga si Ambrosio Ibones paghimo og lakang aron pagresolbar niining kanunay nga panagbangi sa mga bata ug sa mga gitudlong house parents.

Menor nangawat

Sa laing bahin, Duha ka menor de edad ang naaktohan sa mga sakop sa Cebu Provincial Highway Patrol Field Unit (CPHPFU) nga nangawat sa sulod sa kampo nga nahimutang sa Sudlon, Barangay Lahug Dakbayan sa Sugbo.

Matud ni Police Captain Michael Gingoyon nga naaktohan ang maong mga bata nga nanguha og parte sa sakyanan ug motor nga mga gipang impound sa sulod sa ilang kampo.

Matud niya nakadungog sila og mga kasikas sa impounding area mao nga ilaha kining gisusi ug nasakpan ang duha nga nag edad og 17 ug 15 anyos nga nanguha og mga butang.

Nasayran sab nga nag edad pa og 13 anyos ang duha sa dihang nakat-on og pagpangawat sa dihang ilang gisukitsukit. Nagduda ang mga polis nga dili lang kini ang unang higayon nga nakasulod ug nangawat sa ilang kampo ang duha.

Na-recover gikan sa duha ang Mitsubishi Strada Propeller Shaft; Toyota Fortuner Fan Motor;Toyota Denso brand Control Box; tulo ka Ignition Coils; Clutch Fan or Engine Auxiliary Fan; duffle bag; ug gabas sa puthaw.

Ang duha gidala na ngadto sa Operation Second Chance sa Brgy. Kalunasan. Rowena Capistrano ug Decemay P. Padilla/IBM (BANAT NEWS)