Greyhound sa CCJ gihangop ni Labella

CEBU, Philippines — Gidayeg ni Mayor Edgardo Labella ang kalampusan sa greyhound operation sa mga tinugyanan sa Philippine National Police, Bureau of Jail Management and Penology ug Philippine Drug Enforcement Agency 7 sa Cebu City Jail Male Dormitory. Ang greyhound gipahigayon niadtong nilabay nga Sabado nga niresulta sa pagkasakmit sa nagkadaiyang kontrabando sama sa shabu, cellphone, kwarta ug uban pa.

Matud ni Labella nga iyang gidayeg ang maong operation ug ipadayon gihapon ang kombate batok sa mga ilegal nga kalihukan sulod sa city jail.

Sumala pa ni Labella nga magpaabot siya sa sulat gikan sa tagdumala sa city jail kung unsay ilang mga panginahanglanon sama sa signal jammer ug ekipo nga magsusi sa matag tawo nga mosulod sa maong pasilidad kay andam ang siyudad mohatag sa niini.

Dugang sa mayor nga angayan gyud hatagan og pagtagad ang mga problema sa city jail tungod kay dugay na kining panahon nga nasinati ang maong problema ug naghuot na usab ang maong pasilidad nga para ra unta sa dul-an 2,000 ka Persons Deprive of Liberty apan karon dul-an sa 7,000 na ang naa sa maong jail diin kadaghanan sa mga kaso may kalabutan sa ilegal nga drugas.

Tinguha sa kadagkuan sa Cebu City Jail nga makabaton og kahimanan aron masusi ang tanan mga mosulod sa maong pasilidad ilabi na adunay mga nadakpan nga tuyo mopalusot og mga kontrabando nga ipangpasok sa mga pribado nga parte sa kalawasan. /GMR (BANATNEWS)