Mga babayeng polis sa PRO-7 gipasidunggan

CEBU, Philippines — Ang mga babayeng polis sa Police Regional Office (PRO)-7 ang gipasidungan subay sa pagbukas kagahapon sa Women’s Month.  

Si Senador Imee Marcos maoy guest speaker sa gihimo nga kalihukan  diha sa PRO-7.

Matud ni Marcos nga sa panahon karon ang kababayen-an makigbansay uban sa mga kalalakin-an ilabi na sa panerbisyo isip polis.

Gilakbit ni Marcos ang panultihon nga “the best Pilipino is Pilipina” tungod kay ang mga babaye kasaligan, walay bisyo ug consistent.

Mapasigarbohon usab si Marcos sa nakita nga mga top notcher sa pakigbisog batok sa illegal nga drugs, anti-criminality, ug uban diin kasagaran niini mga kababayen-an.

Nunot niini, ang pag-ila sa Danao City Police Station isip best police station ubos sa lederato ni Police Lieutenant Colonel Maribel Getigan.

Ang Danao City Police Station maoy nag-una nga adunay daghan nga nasikop sa kampaniya batok sa ilegal nga sugal.

Giila usab nga nag-unang police station sa nasud diin ang tanang personnel niini mga babaye ang Maria Police Station sa Probinsiya sa Siquijor ubos sa pagdumala ni Police Captain Besas.

Laing gipasidunggan sila si Police Lieutenant Colonel Emelie Santos, hepe sa Bogo City Police Station; Police Lieutenant Colonel Clarisse Gabutan, hepe sa Carcar City Police Station; Police Lieutenant Colonel Janette Rafter, hepe sa Toledo City Police Station ug Police Lieutenant Colonel Catherine Ramos, hepe sa Tanjay City Police Station.

Si Ramos ang nag-inusarang babayeng hepe sa mga police station sa Negros Oriental.

Atol sa pagbukas kagahapon sa Women’s Month ang tanang kababayen-an sa PRO-7 ang niparada. /BDB (BANATNEWS)