Dili mohatag og tukmang impormasyon diha sa health card silotan

CEBU, Philippines — Gawas sa mga mopakatap og fake news pamultahan usab sa Probinsya sa Sugbo ang  mga pasahero nga dili magtarong o mamakak sa ilang ibutang diha sa health declaration cards inig abot nila diha sa entry points sa Lalawigan sa Sugbo sama sa pantalan ug tugpahanan.

Si Gobernador Gwendolyn Garcia nagkanayon nga angay nga adunay silot aron magtinarong og fill-up ang mga pasahero pagsiguro nga dili makasulod ang corona virus disease (COVID-19) sa Sugbo.

Ang silot mao ang pagbayad og P5 mil nga multa o pagkapriso hangtud sa usa ka tuig depende sa desisyon sa korte.

Ang pito sa 26 ka Korean nationals nga niabot sa Sugbo niadtong Pebrero 25 gikan sa Daegu City, North Gyeongsang Province ang epicenter sa outbreak sa covid-19 sa South Korea ang unang gikataho mga missing.

Apan giingong nakit-an o nasubay ra dayon kini niadtong Pebrero 28.

Matud ni Dr. Jaime Bernadas, regional director sa Department of Health (DOH)-7 nga ang pito ka Korean nationals wala kini didto sa hotel nga ilang gibutang sa health declaration cards.

Si Garcia nagkanayon nga iyang hangyuon ang kapolisan ug bisan ang National Bureau of Investigation (NBI)-7 nga motabang sa mga airport personnel nga mosusi sa mga pasahero ug sa health declaration cards sa mga pasahero nga moabot sa Mactan Cebu International Airport (MCIA). /BDB (BANATNEWS)