Maestra “nangumot” og tinun-an gipadakop

CEBU, Philippines — Gidakop sa Pardo Police Station ang usa ka maestra sa usa ka pribadong tunghaan sa nursery school sa Barangay Bulacao Dakbayan sa Sugbo tungod sa pasangil nga gikumot niini ang nawong sa 4-anyos nga tinun-an.

Matud ni Pardo Police Station Chief Police Major John Kareen Escober nga   gireklamo sa ginikanan sa bata ang 39-anyos nga Nursey 2 nga magtutudlo human misumbong ang ilang anak nga gikumot niini ang iyang nawong.  Ang Women’s Children and Protection Desk sa Pardo Police Station gisugat unta sa ginikanan ang bata apan sa pagabot niini, naghilak kini ug dihang gipangutana nitug-an kini sa gibuhat sa maestra.

Matud pa nga nasuko ang maestra kay wala mosuwat sa test paper ang bata ug pagkahuman gikumot kini sa nawong.  Ang maestra wala mohatag og pamahayag sa media diha sa Pardo Police Station. /IBM (BANATNEWS)