Kapilya sa Our Lady of Fatima Portugal tukuron sa San Remigio

CEBU, Philippines —  Tukuron ang unang kapilya sa replica sa Our Lady of Fatima Portugal sa Asya sa Lungsod sa San Remigio, amihanang bahin sa Lalawigan sa Sugbo.

Niadtong Huwebes gipahigayon ang ground breaking sa tukuran nga gipangulohan ni Cebu Archbishop Jose Palma ug kaparian, Mayor Mariano Martinez ug gatusan ka magtutuo sa Barangay Tacup.Mapasalamaton ang Arsobispo nga Pilipinas ang napili sa Asya ug dinhi pa gyud sa Sugbo nga magsaulog sa 500 Years of Christianity sa tuig 2021.

Ang Arsobispo nitug-an nga ang maong proyekto dili lang kini iya sa World Apostolate of Fatima kung dili sa tibuok katawhan sa Archdiocese of Cebu.

Samtang si Reynald Andales, WAF International Board of Trustees, nitug-an nga ang ground breaking naatol sab sa ika-100 years death anniversary ni Santa Jacinta.

Matud ni Andales nga daghan silang lugar nga giadtoan apan ang Barangay Tacup maoy gitouhan nilang gitagana sa Mahal nga Birhen human gidonar usab kini sa pamilya ni Fr. Lyndon Ruiz gikan sa iyang mga apohan ug siyay gitahasan sa maong tulo ka ektaryang luna.

Dul-an sa 20 ka adlaw lang human ilang gitakda ang ground breaking nahimoan dayon kini og dalan ang bukid uban sa abag sa kagamhanan sa Lungsod sa San Remigio.

Si Fr. Ruiz sa iyang bahin mapasalamaton sa iyang mga apohan sa yuta nga gitahas kaniya diin sulod sa dugay nga katuigan mapahimuslan na gyud human sa katukuran sa maong kapilya.

Samtang si Martinez sa iyang bahin mapasalamaton nga sila ang napilian alang sa katukuran sa kapilya.

Gitug-an sa mayor nga ang lokal nga kagamhanan motabang pagbutang og tubig lakip ang kuryente sa lugar aron magpadayon na ang maong proyekto.

Ang spiritual director sa WAF, Msgr. Ruben Labajo, vicar-general sa Archdiocese ug team moderator sa San Francisco de Asis Balamban, nibutyag nga daghang lugar ang gitanyag ug gipilian apan ang Barangay Tacup sa San Remigio maoy napilian.

Matud ni Labajo nga nindot kaayo ang nahimutangan sa maong kapilya tungod kay ang kasadpan wala pa may nibarug nga pilgrim site ug kini pa lang unya.

Ang replica sa kapilya mao unya kini ang padulngan sa mga magtutuo nga dili makaadto sa Fatima nansud sa Portugal. GMR (BANATNEWS)