Road-widening projects sa Cebu City sugdan

CEBU, Philippines — Tulo ka mga karsada sa Dakbayan sa Sugbo ang palapdan karong tuiga nunot sa nagkadakong problema sa trapiko sumala pa ni Cebu City Councilor Jerry Guardo.

Matud ni Guardo ang Department of Public Works and Highways (DPWH)-7 maoy mopalapad sa Juan Luna Avenue; Sergio Osmeña Avenue; ug sa Salinas Drive sa Lahug pinaagi sa pagdugang og tagduha ka lanes.

Hinuon dili kini trabahoon og dungan karong tuiga lang, anamon ra kini pasabot pa ni Guardo. Ang maong proyekto gastohan og P823 milyones sa maong ahensya. Sa pagkakaron, ang nakalangan nalang mao ang road right of way tungod kay adunay mga establisamento o mga panimalay sa mga pribadong tawo ang maigo.

Ang unang hugna sa maong proyekto na bid-out na og duna nay kontraktor samtang ang nahibiling duha ka hugna gikatakda pang i-bidding.

Ang phase two mao ang dalan sa Osmeña Boulevard corner V. Sotto nga gahinan og P600 milyones. Ang 37 metros ang idugang aron mahimo kining 8-lane, nga adunay gitas-on nga 114 metros. Ug ang ikatulo mao ang Salinas Drive-Gorordo Avenue - Veterans Drive nga gahinan og P700 milyones alang sa 30 metros nga dugang lane nga may gitas-ong 301 metros aron himuon kining 6-lanes.

Matud ni Guardo, ilang suportahan ang maong mga proyekto kay kinahanglang masulbad ang problema sa traffic. –/IBM (BANAT NEWS)