Security guard walay lisensiya ang armas sikop

CEBU, Philippines – Natingkagol sa detention cell sa Presinto 3 sa  Mandaue City Police Office (MCPO) ang usa ka lalaki kinsa giingong nagdala og armas ug gialarmahan sa kapolisan niadtong Martes sa gabii diha sa Zone Sibuyas, Barangay Paknaan, Dakbayan sa Mandaue.

Si  Police  Staff Sergeant Oliver Gipanao  sa Presinto 3 niila sa suspetsado nga si  Carmelo Victor Alegarme, 39, taga Sitio Mustang, Barangay Pusok  sa Dakbayan  sa Lapu-Lapu ug giingong usa ka gwardiya .

Matud ni Gipanao nga pipila ka  residente sa Zone Sibuyas nisumbong sa ilang buhatan dihang nakamatikod sila og armadong lalaki nga nagbantay  sa usa ka pribadong reclamation area nga nahimutang sa maong dapit.

Ang suspetsado giingong naabtan sa mga polis nga nialarma nga naghupot og 9mm nga pistol diin ang magazine niini puno sa bala.

Ang suspetsado wala makapakita og dokumento sa maong armas hinungdan nga gidakop kini sa mga polis.

Giingong ang suspetsado nibutyag sa mga polis nga 32 ka security guard nga nadestino sa pagbantay sa maong reclamation area. /BDB (BANAT NEWS)