E-Patrol sa LTO mobisita sa Talisay

CEBU, Philippines – Maayong balita alang sa mga Talisaynon nga gustong mokuha og lisensiya ug uban pang transaksyon sa Land Transportation Office. Kini tungod kay ang E-Patrol sa LTO-7 mobisita sa Dakbayan sa Talisay alang sa mga mokuha og lisensiya.

Ang mokuha og Student Permit magdala og birth certificate gikan sa Philippine Statistics Authority samtang ang magpa-renew o mag-upgrade sa lisensiya, dad-on ang ang ilang karaang lisensiya.

Kuyog sa E-Patrol ang doktor nga mohatag og medical certificate ug drug test nga maoy usa sa mga gikinahanglan.

Ang E-Patrol nakig-alayon ni Mayor Gerald Anthony “Samsam” Gullas Jr. hinungdan nga anha kini mopahimutang sa atubangan sa buhatan sa City of Talisay-Traffic Operation Development Authority o sa may Inasal Park. Matud ni Gullas nga higayon na kini sa mga Talisaynon tungod kay paspas ang serbisyo sa E-Patrol aron mapaduol sa katawhan ug pag-agni nga iparehistro gyud ang ilang mga sakyanan ingon man pagkuha og lisensiya sa pagmaneho. /GMR (BANAT NEWS)