Polis, 2 ka suspek patay sa engkwentro

CEBU, Philippines – Patay ang usa ka polis ug duha ka suspek samtang tulo ang nadakpan atol sa operasyon sa Philippine National Police Drug Enforcement Group (PNP-DEG) Visayas sa Sitio San Roque, Tabada, Mambaling, Dakbayan sa Sugbo niadtong Martes sa gabii.

Gika-engkwentro sa kapolisan ang grupo ni Franco Obeso atol sa operation nga niresulta sa pagkamatay ni Police Senior Master Sergeant Maximo Macua, sakop sa PNP DEG Visayas, kinsa napusilan sa iyang dughan.

Matud ni Police Regional Office 7 Director Albert Ferro nga ang nahitabo kang Macua nagpamatuod nga mga hard core criminals ang mga drug lords sa Central Visayas.

Dali nga gidala sa Miller Hospital si Macua apan naabtan nalang ni Ferro nga patay na.

Nakasibat ang mga suspek apan si Obeso napusilan sab ug gidala sa Vicente Sotto Memorial Medical Center diin gi-hospital arrest sa kapolisan ug ang kauban niini nga si Jeremea Zafra.

Human sa pagsukit-sukit sa kapolisan kang Zafra gipahigayon ang hot pursuit operation sa Sitio Cauyan, Barangay Quiot diin lain na usab nga pakigpinusilay ang nahitabo diin napatay si Ronald Sagarino ug usa ka nailhan lang nga Joe samtang nasikop ang kauban nga si Richie Requinto.

Subay niini nibahad si Ferro sa mga kriminal ug nalambigit sa ilegal nga drugas nga wala silay lugar sa Central Visayas.

“Hawa mo diri, wala moy lugar diri sa Central Visayas. I will hunt you one by one and you will face the full force of the law,” matud ni Ferro.

Gibutyag ni Ferro nga personal nga kaila niya si Macua isip escort dihang director pa siya sa PNP Anti-Illegal Drug Group.

Daku ang pagtuo ni Ferro nga nalakip sa gun-for-hire ug riding-in tandem sa mga drug groups sa Central Visayas ang mga nakapatay kang Macua. Lakip sa na-recover ang mga motorsiklo nga gituohang kinawat.

Aduna pay laing mga kauban si Obeso nga gipangita karon sa mga awtoridad human nakasibat sa nahitabong engkwentro.  

Gikapoy nag-pusher

Dul-an sa tunga sa milyon ka pesos ang nasakmit nga ginadili nga drugas gikan sa 29-anyos nga lalaki kinsa nasikop sa kapolisan sa Waterfront Police Station sa may Palma Street, San Roque, Dakbayan sa Sugbo niadtong Martes sa gabii.

Ang nasikop naila nga si Jordan Tortor, residente sa maong lugar, kinsa nasakmitan og shabu nga balor sa dul-an sa P442 mil.

Ang dinakpan nangangkon nga gikapoy na siya sa iyang trabaho nga gamay og sweldo hinungdan nga nisulod nalang siya sa pagpaninda sa ginadiling drugas.

2 pusher, 3 gro sikop

Nasikop sa buy-bust operation ang lima ka pusher og shabu nga naglakip sa tulo ka babaye sa Zone 1, Barangay Buaya, Dakbayan sa Lapu-Lapu.   Ang mga dinakpan mao sila si Yoven Malingin Carillas, 40, ug Fimar Inot Aying, 19, pulos nagpuyo sa maong dapit, kinsa nasakmitan og shabu ngabalor og P12,512.

Dugang nasikop mao sila si Maria Cristine Masong Alcantara, 26, taga V. Gullas Extension, San Roque, Dakbayan sa Sugbo; Candice Mae delos Angeles Codilla, 27, ug Genebeth Matugas Cuesta, 24, mga guest relation officer nga nagpuyo sa Sitio Sangi, Pajo, Dakbayan sa Lapu-Lapu, kinsa nasakmitan og P13,872 ngabalor sa shabu ug kwarta nga P2,000. Rowena D. Capistrano, Romeo T. Limpangog/GMR (BANAT NEWS)