Nagmotor nabagnos sa karsada angol
CEBU, Philippines — Nisarasay ang motorsiklo nga gisakyanan sa usa ka lalaki human wala na makakontrolar sa dihang nisubay sa nagbawod-bawod nga karsada atubangan sa Barangay Hall sa Lawaan 1, Dakbayan sa Talisay kagahapon sa buntag.
Samdan si Jo Marie Sabay, 25-anyos, taga Barangay Inoburan, Siyudad sa Naga, human nabagnos sa karsada.
Nabangga pa gyud ang iyang motorsiklo sa gikasugat nga bus nga gimaneho ni Ryan Daculan, 27-anyos, taga Lungsod sa Sibonga. Si Sabay gikan sa iyang trabaho nga mopauli na sa ila apan pag-abot niya sa nahisgutang lugar nisuway kini og overtake sa nag-una nga sakyanan.
Apan si Sabay nisubay sa nagbawod-bawod nga karsada hinungdan nga wala na kini makakontrolar hangtud nga natumba ug nabagnos sa karsada.
Nabangga man ang iyang motorsiklo sa gikasugat nga bus apan maayo nalang nga wala siya nalatayi niini.
Nisuway sa paglikay si Daculan nga maigo si Sabay apan wala na gyud niya kapugngi ang pagbangga.
Gidala sa tambalanan ang biktima samtang si Daculan ang gitanggong samtang gipaabot nga pasakaan og kaso. /GMR (BANATNEWS)
- Latest
