PB nitugot kang Garcia pagdumala sa CMWD

CEBU, Philippines — Gilauman nga ang Probinsiya sa Sugbo ang hingpit na unya nga makadumala sa operasyon sa Cebu Manila Water Development Corp. (CMWD) alang sa paghatag og bulto nga supply sa tubig gikan sa Luyang River sa lungsod sa Carmen ngadto sa pipila ka lungsod ug dakbayan sa Sugbo.

Kini human nga ang hunta probinsiyal nihatag na og pagtugot kang Gobernador Gwendolyn Garcia nga mohulma og interim protocol ug terms of reference alang sa pagdumala sa CMWD samtang padayon pa ang proseso sa pagputol sa kasabotan o ang Joint Investment Agreement tali sa Probinsiya sa Sugbo ug sa Manila Water Consortium Inc. Si Garcia nagkanayon nga kinahanglang adunay protocol nga sundon alang sa pag-supervise sa pagpadayon nga pag-deliver sa 35,000 liters nga bulk water supply ngadto sa Metro Cebu.

Matud ni Garcia nga kon ang Kapitolyo na ang modumala sa operasyon niini ang provincial treasurer maoy motan-aw o modumala sa financial aspect samtang ang provincial engineering office usab ang sa teknikal nga aspeto. Ang investment agreement tali sa Kapitolyo ug sa MWCI buot na nga putlon sa probinsiya human nga ang maong kampaniya giingong nakahimo kini og kalapasan sa kasabotan. /BDB (BANATNEWS)