Sarok Festival gikanselar tungod sa nCoV
CEBU, Philippines – Gikanselar ang gikatakda unta karong adlawa nga Sarok Festival Grand Parade sa Lungsod sa Consolacion isip kabahin sa centennial celebration sa lungsod tungod sa hulga sa 2019 Novel Corona Virus.
Ang hukom ni Mayor Joannes Alegado gipasikad sa Memorandum Circular sa Department of Interior and Local Government ug Department of Education.
Giawhag sa DepEd ang mga tinun-an sa paglikay sa pagsagol sa nagtapok nga mga tawo samtang ang DILG nagmando sa mga buhatan sa kagamhanan sa paghatag og tukma nga kasayuran sa katawhan labot sa sakit.
Ang mga contingents sa Sarok Festival Grand Parade gilangkuban sa mga tinun-an gikan sa nagkadaiyang tunghaan sa elementarya ug high school.
Tinguha sa kagamhanan nga mapahigayon gihapon ang festival sa higayun nga molurang na ang maong sakit sanglit tibuok tuig 2020 man nga ilang saulogon ang ika-100 ka tuig sa lungsod. /GMR (BANAT NEWS)
- Latest
